FRÉTTATILKYNNING

Litrík skrúðganga fagnar náttúru, þjóðsögum og almyrkva á sólu

Reykjanesbær | Þriðjudaginn 11. ágúst 2026 | kl. 18:00–19:00

Daginn fyrir almyrkva á sólu verður efnt til skrúðgöngu goðsagna og landslags - Landscape Myth Parade í Reykjanesbæ, þar sem íbúum og gestum er boðið að taka þátt í einstökum viðburði sem sameinar myndlist, þjóðsögur, náttúru og skapandi þátttöku. Skrúðgangan er lokaviðburður samfélagslistaverkefnisins Landscape Myth, sem unnið hefur verið að undanfarnar vikur á vegum Samfélags fyrir öll – Community for All. Þátttakendur á öllum aldri og af ólíkum uppruna hafa kynnst íslenskum þjóðsögum, líffræðilegri fjölbreytni Suðurnesja og sögnum tengdum sólmyrkva. Um leið hafa þeir hannað og skapað búninga, grímur og táknræn listaverk úr náttúrulegum og endurunnum efniviði.

Í skrúðgöngunni munu þátttakendur klæðast eigin listaverkum sem sækja innblástur í eldfjallalandslag Íslands, plöntur, fuglalíf, lífríki hafsins og þjóðsagnaverur. Með lifandi tónlist, gjörningum og gagnvirkum uppákomum umbreytast götur bæjarins í lifandi hátíð sem fagnar náttúru og menningararfi Suðurnesja.

„Landscape Myth er tækifæri fyrir fólk á öllum aldri til að skapa saman, deila sögum og upplifa hvernig list getur tengt fólk við náttúruna, menninguna og hvert annað. Það er sérstaklega ánægjulegt að geta fagnað þessum einstaka stjarnfræðilega viðburði með samfélaginu á skapandi og aðgengilegan hátt,“ segir fulltrúi verkefnisins hjá Samfélagi fyrir öll.

Öllum er velkomið að taka þátt, hvort sem er í skrúðgöngunni eða sem áhorfendur á gönguleiðinni.

Í tengslum við viðburðinn verða sólmyrkvagleraugu afhent án endurgjalds svo gestir geti notið almyrkvans á öruggan hátt daginn eftir. Að loknum sólmyrkvanum verður gleraugunum safnað saman og þau send áfram til samfélags þar sem næsti almyrkvi verður á sólu. Skrúðgöngunni lýkur við Skessuhelli, þar sem öllum verður boðið upp á heitt súkkulaði og notalega samveru.