Lagt af stað kl. 19:00 frá Þórarinsstöðum. Þaðan er gengið á Háhnjúk. Útsýnið þaðan er glæsilegt þó að það ráðist augljóslega af veðri. Þaðan verður gengið niður í Hildarsel sem er eyðibýli og er nú orðið hluti af landi Berghyls. Í Hildarseli eru tóftir eftir búsetu, sem og Hildarselsfoss í Litlu-Laxá en foss þessi fær gjarnan önnur heiti þegar um hann er rætt. Ef tími gefst til má skoða annan foss rétt ofar í ánni. Síðan er gengið til baka að Þórarinsstöðum. Áætlaður göngutími er u.þ.b. 3 klst. Gangan hefst á langri brekku upp að Háhnjúki en eftir það ætti gangan ekki að vera erfið. Kristín Erla Ingimarsdóttir á Þórarinsstöðum og Sigurjón Snær Jónsson á Berghyl leiða gönguna.