Reykjanesið býður upp á margar frábærar og fallegar gönguleiðir og fljótlegt er að skjótast þangað á bíl frá Höfuðborgarsvæðinu. Jarðhitasvæðið vestan við Djúpavatn er falin perla, litrík, viðkvæm og falleg. Svæðið minnir að nokkru á Torfajökulssvæðið sunnan Landmannalauga en er smærra í sniðum og litríkir hryggirnir sem minna á Grænahrygg norður af Torfajökli gleðja augað. Þessi leirgil- og hryggir kallast því skrítna nafni Sogin og hafa mótast af jarðhita og eldvirkni í iðrum jarðar. Gangan er auðveld og hægt að fara frá Djúpavatni og ganga hring um svæðið með viðkomu við Spákonuvatn og Grænavatn. Gaman er að fara svo upp á Grænavatnseggjar og njóta stórfenglegs útsýnis yfir Djúpavatn, Reykjanesið allt og fjöllin norður af Reykjavík. Gönguleiðin er um 8 km og tekur um 4 tíma með góðum tíma til að njóta umhverfisins og taka góð nestishlé. Við hittumst við bílastæðið við austurenda Djúpavatns, en þangað liggur holóttur malarvegur, Vigdísavallarvegur sem ekið er inn á skammt frá Kleifarvatni. Vegurinn er fær öllum bílum að sumarlagi en best að aka rólega.