Fara í efni

Tjaldsvæðið Reykholt

Ferðagjöf á ekki við um þessa þjónustu

Tjaldsvæðið er innan þéttbýliskjarnans að Reykholti, skammt frá félagsheimilinu Aratungu. Stutt er í allar áttir svo sem að Gullfossi, Geysi, Flúðum og Laugarvatni. Laugarás er aðeins 15 mín akstur í burtu en þar er dýragarðurinn Slakki. Svæðið skiptist niður í nokkra fallega lundi og eina stóra flöt sem verið er að planta í og skipta niður.

Aldurstakmark er 25 ára en svæðið er fjölskyldusvæði.

Í nágrenninu má finna verslun og veitingastaðinn Café Mika og Friðheima með sína frægu tómatsúpu. Göngufæri í sundlaugina.

Stóra-Fljót markaðist af Fellslæk í norðri, Tungufljóti í austri, Reykjavöllum í suðri og Litla-Fljóti í vestri. Býlið stóð í upphafi vestan þjóðvegar skammt frá bænum Brautarhóli en var flutt undir brekkuna neðan Reykholtshvers árið 1939. Þáverandi eigandi Þorsteinn Loftsson byggði fyrstu garðyrkjustöðina í Reykholti á flötinni fyrir neðan. Fyrsta gróðurhús í uppsveitum Árnessýslu, sem hitað var upp með hverahita byggði aftur á móti Stefán Sigurðsson skólastjóri barnaskólans árið 1932. Það stóð á stalli í brekkunni á milli gamla skólahússins og Reykholtshvers. Upp úr 1945 var síðan lagður grunnurinn að flestum garðyrkjustöðvunum sem fram til ársisn 1961 voru eina byggðin í Reykholti auk skólans.

Árið 1961 var vígt nýtt samkomuhús sveitarinnar, sem hlaut nafnið Aratunga í höfuðið á Ara Fróða. Ný sundlaug var vígð 1975 og Íþróttahús 1999. Verksmiðja var reist árið 1990. Skólinn var stækkaður árið 1959, 1990 og aftur nýlega.

Grunnur að byggðakjarnanum í Reykholti var lagður árið 1928, þegar barnaskóli var reistur. Þá hafði eigandi jarðarinnar Stóra-Fljóts gefið Biskupstungnahreppi landskika undir bygginguna. Þetta var eitt fyrsta skólahús sem reist var í dreifbýli á Íslandi og þótti mjög glæsileg framkvæmd. Í Reykholti eru nú nálægt 200 íbúar.

Jarðhiti fannst í Reykholti á fyrri hluta 20. aldarinnar og myndaðist fljótlega byggð í kringum jarðhitasvæðið.

Reykholtshver er forn goshver sem gýs á 10 mín fresti og gefur 14 l á sekúndu af 100 gráðu heitu vatni, sem nýtt er til að hita upp heimili og gróðurhús á svæðinu. Til eru sagnir um að Skálholtssveinar hafi verið sendir til að stífla hann fyrr á öldum, enda hverir áður taldir hin mestu vandamál. Skepnur fóru sér iðulega að voða í þeim eða affalli þeirra að ekki sé talað um hjátrúna varðandi það hvaðan allur þessi hiti væri kominn. Hverinn var fyrst nýttur til upphitunar barnaskólans 1928 og síðan fljótlega til upphitunar gróðurhúsa og annarra mannvirkja.
Borað var um 20 metra frá honum 1976 og aftur 1990 við skólahúsið vegna aukinnar notkunar. Steypt hefur verið yfir hverinn svo fátt minnir á forna frægð nema ef vera skyldi strompurinn, sem losar hann við gufuna á nokkurra mínútna fresti. Af Reykholtinu er víðsýnt þótt holtið sé ekki nema 116 metra yfir sjávarmáli.

Verðskrá og nánari upplýsingar má finna hér.

Hvað er í boði